Compostela Valley- Apil sad ang Comval Province sa mga probinsiya sa nasud nga nagselebrar sa “26th National Children’s Month 2018”, ug parte sa pagsugod sa usa ka bulang selebrasyon ang paghatag ni Gov. Jayvee Tyron Uy sa iyang “Local State of the Children’s Report” atol sa Employees Regular Convocation Program diha sa kapitolyo diin gipasabot sa report sa Gobernador ang mas gipakusgang Nutrition Program sa mga kabataan.
Matud pa niya nga usa sa mga importanteng gitutokan sa iyang administrasyon panahon sa iyang paglingkod nga gobernador sa Comval Province ang mas gipakusgang Nutrition Program nga miresulta sa kusog nga pagkunhod sa Malnutrition Prevalence Rate sa tibuok probinsiya nga naa na lang sa 2.9% sa 2018 gikan 3.6 % sa 2017 ug 4.5% sa 2016.
Apil sa mga mahinungdanong unod sa report sa gobernador ang mga paningkamot sa probinsiya nga maprotektahan ang Civil Rights and Freedom sa mga kabataan; ang bahin sa Family and Alternative Care; ug ang bahin sa ginahatag nga Basic Health and Welfare, Basic Education, Leisure and Cultural Activities, ug Special Protection nga padayong ginatahag kanila sa probinsiya pinaagi sa nagkadaiyang mga opisina sa gobyerno.
Nahitabo ang National Children’s Month Celebration diha sa Ground Floor sa kapitolyo niadtong Nobyembre 5, 2018 ug apil sa mga mitambong sila BM Macario Humol; BM Vivencia Secuya; PA Virgilia S. Allones; ug ang mga PG Department ug assistant heads, ug DILG PD Noel Duarte nga maoy mihatag sa Rationale sa selebrasyon sa “National Children’s Month (NCM)2018”.
Karong tuiga ang Comval Province nagsaulog sa “26th National Children’s Month” ilalom sa temang “Tamang Pag-aaruga Para sa Lahat ng Bata”, diin gitumong niini ang pagpanalipod sa katungod sa mga kabataang Comvaleño subay ang mga nasabotan sa United Nations Convention on the Rights of the Child (UNCRC) nga mao ang paghatag sa upat ka dagkong mga gasa sa mga kabataan pinaagi sa gipirmahang “World Declaration on the Rights of the Child to Survival, to Development, to Participation, and to Protection”.
Si Provincial ECCD Focal Preciosa Toledo nagsulti nga ang Comval Province nagselebrar sa National Childrens’ Month sa Nobyembre na gikan sa bulan sa Oktobre human naaprobahan ang Republic Act (RA) 10661 kon National Childrens Month Act sa nasud niadtong Hulyo 28, 2014 nga nagbalhin sa pagselebrar niini sa bulan sa Nobyembre na matag tuig.