Cebu City – Nagsugod na sa pagpangandam ang Commission on Election (COMELEC) Cebu Province alang sa Barangay ug Sangguniang Kabataan (SK) elections karong Disyembre 5, 2022.
Gibutyag ni Atty Jerome Brillantes, acting Cebu Provincial Elections Supervisor nga gisugdan na nila ang pagpangandam sa gitakdang piniliay madayon man o dili.
Ang bag-ong mopuli nga House of Representatives gipaabot nga motuki sa proposal pag postpone sa Barangay ug SK elections aron makadaginot sa pondo ug magamit sa response sa National Government sa nagpadayon nga Coronavirus virus (COVID-19) pandemic.
Kini ang gipahibaw ni reelected Leyte Representative Martin Romualdez, kinsa maoy expected nga mamahimong mosunod nga House Speaker sa incoming 19th Congress.
Gi-awhag ni Brillantes ang publiko pag check kung naa pa ba ang ilang pangalan sa list of voters kung madayon ang registration sa Barangay ug SK elections sa unang semana sa Hulyo.
Matod niini nga kadtong indibidwal nga nag-edad ug 14 anyos, ug mo edad ug 15 anyos sa dili pa ang Disyembre 5 nga elections, mamahimo na unyang maka rehistro.
Kung madayon ang registration, mahuman kini sa Oktubre o Nobembre ning tuiga.
Nagkanayon ang Comelec opisyal nga dunay posibilidad nga mopahigayon ug offsite registration sa lain-laing barangay, aron dili sila mabasol sa mga botante kung mapakyas sila sa pagpa rehistro.
“We always find ways at their own comfort to register them,” matod sa Comelec Supervisor.
Gidugang sa opisyal nga duna silay igong gidaghanon sa mga vote registration machine. (Jhon Tadlip Jr.)
(News & photo courtesy of Comelec Cebu Province)