Mibalik na sa normal ang biyahe sa mga lain-laing sakyanan sa kadagatan apil na sa mga motorized banca ug mga fast craft nga nagbiyahe-an sa sa Sugbo ug sa lalawigan sa Bohol. Ang Philippine Coast Guard (PCG) pinaagi ni Lt. SG Erickson Laza sa Coast Guard Station Bohol, mipagawas ganihang buntag Nobyemre 21, 2018 sa pahibawo labot sa paglibkas na sa nauna niining pagpa-suspenso sa biyahe sa nagkalain-laing sakyanan sa kadagatan.
Samtang zero casualty ang lalawigan sa Sugbo nunot sa pag-igo sa bagyong Samuel sa Eastern Visayas, matud pa ni Jules Regner, tigpamaba sa Provincial Disaster Risk Reduction Management Office (PDRRMO).
Mokabat usab sa 276 ka mga residente gikan sa lungsod sa Daanbantayan, Sogod ug usab sa Bogo City ug Danao City ang mibakwit gumikan sa bagyong Samuel. Samtang, pabiling gi-suspenso karong adlawa Nobyembre 21, 2018 ang mga klase sa tanang mga public schools gikan sa kindergarten hangtud sa senior high school sa lalawigan sa Sugbo base sa mando ni Cebu Governor Hilario “Junjun” Davide III.
Sa pikas bahin, subling gimando-an ni Cebu Archbishop Jose Palma ang mga parish priest nga nahisakop sa Cebu Archdiocese pagbukas sa mga simbahan alang sa mga residente nga mamakwit gikan sa ilang mga pinuy-anan epekto sa katalagman.
Matud sa Arsobispo nga kinahanglan gamiton ang mga simbahan isip temporaryo nga evacuation centers alang sa mga bakwit bisan pa man sa mga dili Katoliko. Niadtong nakalabay’ng mga bagyo, gimando usab ni Arsobispo Palma ang pagpagamit sa mga simbahan isip evacuation center. ###