Cebu City- Gikondina sa mga membro sa Order of Carmelites nga nag base sa Mabolo, Cebu City ang bag-ong trailer sa controversial film “Maid in Malacanang” nga nagpakita sa grupo sa mga madre nga nagduwa ug mahjong kauban ni kanhi Presidente Corazon Aquino bag-o pa lang nahuman ang unang Edsa People Power Revolution.
Usa ka opisyal sa order nga wala magpahingan mipadayag nga siya ug ang iyang mga kaubang mga madre na dismaya pag ayo sa ilang depiction sa kontorbersyal nga movie.
“God forgive them. That’s totally fake news,” padayag sa opisyal sa order.
“Wala mi nalipay sa ilang giistorya,” dugang niini.
Miluwat na ug pamahayag si Sr. Mary Melanie Costillas, OCD, labot sa kontrobersyal film nga nilambigit kanila.
“The attempt to distory history is reprehensible. Depicting the nuns as playing mahjong with Cory Aquino is malicious. It would suggest that while the fate of the country was in peril, we could afford to leisurely play games. The truth was that we were then praying, fasting and making other forms of sacrifices for peace in this country and for the people’s choice to prevail,” mensahi ni Sr. Mary Costillas.
Sa trailer, ang kanhi Presidente, nga gidala ni comedienne Giselle Sanchez, gipakita nga nakighinabi kini, pinaagi sa telepono sa usa ka wala maila nga caller labot sa planong pagpalagpot ni kanhi Presidente Ferdinand Marcos ug iyang pamilya ngadto sa gawas sa nasud.
Human sa tawag, gipakita sa salida nga nakig istorya si Aquino sa tulo ka mga madre nag lingkod sa mahjong table; si Aquino nga gibitoonan ni Sanchez milingkod nila ug nakita nga mi apil ug duwa.
Ang opisyal nga mipadayag sa iyang kasagmuyo, usa sa mga madre nga mipadayon ni Aquino sa Sugbo niadtong February 22, 1986, o ang mismong adlaw sa pag buto sa unang People Power Revolution.
Gisaysay sa opisyal nga midangop si Aquino sa monastery; gidala kini sa mga officials sa opposition pasado alas 9 sa gabii, human misalmit sa sunod sunod nga mga rally sa Syudad sa Sugbo.
Nagkanayon ang opisyal nga gidala si Aquino sa monastery human siya ug ang iyang mga kaubang mga oposisyon sa Sugbo, pinanguluhan sa mitaliwan na nga si kanhi Kongresista Antonio “Tony” Cuenco, giingong gipangita sa mga assassins.
“She came here only to sleep. Gikapoy gane kaayo siya kay gikan man to siya ni-attend ug mga rallies ato,” saysay sa opisyal.
Si Monsignor Joseph Tan sa Archdiocese of Cebu, kinsa namahayag subay sa hangyo sa mga madre sa Carmelite, nagkanayon nga walay nahitabong duwa nga mahjong ni kanhi presidente Cory Aquino ug sa mga madre atol sa EDSA Revolution nga gi depict sa historical film “Maid in Malacanang.”
Gitawag ni Tan ang film nga “entertainment’ ug mipahibaw nga wala konsultaha ang mga madre ni bisan kinsa gikan sa production.
“The nuns were praying and consulting the former president,” pahibaw ni Tan.
Giingong nibiya ra sab si Aquino sa monastery pasasdo alas 11 sa buntag, pagka ugma, pa balik sa Manila.
Ang Maid in Malacanang, nga gitakdang ipasalida sa screen Miyerkules, Agosto 3, gi-angkon nga reenactment sa katapusang tulo ka mga adlaw sa pag gunit sa gahum sa gihulagway nga diktador sa wala pa mapalagpot atol sa unang People Power Revolution.
l via Jhon Tadlip
Source/Photo: Carmelite Monastery, Monsignor Joseph Tan, Maid in Malacanang trailer