Cebu City – Makabalik na sa pag dawat ug guests sa 100 porsento nga capacity ang mga establisemento sa Syudad sa Sugbo.
Kini ang gibutyag sa kagamhanan sa syudad.
Gipahibaw sa Emergency Operations Center (EOC) Cebu City, Miyerkules, Marso 16, 2022 nga gitugtan nang maka operate ang mga patigayon hangtud sa 100 porsento nga kapasidad.
“Pwede na (sila mubalik sa 100 percent capacity). We give that latitude but then again they can go what is being provided for,” mensahi ni Konsehal Joel Garganera, pangu sa EOC.
Dugang niini, gihatagan sab ug higayon ang mga magpapatigayon nga maghimo ug palisiya sa pag self-regulate sa ilang operasyon.
Mipahigayon sab si Mayor Michael Rama ug laing closed-door ‘convergence’meeting aron pagtuki sa mga measures nga ipatuman karon nga ang Syudad sa Sugbo, ubos na sa Alert Level 1, mga maoy labing luag nga quarantine classification.
Matod ni Garganera nga gihangop sa tanang sectors sa syudad ang maong kalambuan.
“Mapasalamaton kaayo. In fact, we were very confident earlier last week nga madeescalate ta… This is an achievement wherein kitang tanan nakakooperar,” dugang sa konsehal.
Bisan pa man sa pagluwag na sa restrictions, padayon gihapon ang mga opisyal sa syudad pag pahinumdum sa publiko nga kanunayng sundon ang minimum health protocols.
“As we increase our capacity, our movement, mao nay tahas run subay sa bottoms-up guidelines nga gihatag sa mayor. Dili pwede nga ang mga tawo mutubay lang sa protocol ug naay mga tawo sa gobyerno nga maoy mu-oversee. So, this is now a shared responsibility,” gitataw ni Garganera .
Ang Syudad sa Sugbo maoy bugtong nadugang sa lista sa mga lugar ubos sa Alert Level 1 sa Central Visayas; ang probinsya sa Siquijor na downgrade na niadto pang Marso 1. (Jhon Tadlip)
(Source: Emergency Operations Center-Cebu City, photos courtesy by Richie Cuico | Alfred Robles)