Nagtinguha si Cebu City Mayor Tomas Osmena nga mo-apelar ngadto sa Korte Suprema aron malibkas ang ban sa operation sa Angkas.
Gibutyag ni Osmena ngadto sa mga tigbalita nga pangunayan niya ang pag-apelar sa Korte Suprema aron nga katugtan ang operation sa Angkas, usa ka matang sa transport system nga naggamit og motorsiklo. Niadtong Disyembre 5, 2018 ang Korte Suprema miluwat sa usa ka Temporary Restraining Order (TRO) batok sa naha-unang desisyon sa Mandaluyong City Court nga nagtugot sa operation sa Angkas.
Sayo niini, ang Land Transportation Franchising and Regulatory Board (LTFRB) misang-at og kaso batok sa Angkas ug miawhag sa korte nga undangon ang operation niini tungod sa kakuwang sa franchise pag-operate sa usa ka public transport system.
Samtang gipasabot ni Osmena nga ang TRO nga giluwatan sa Korte Suprema naghatag og dugang kalisdanan sa katawhan pagbiyahe ilabi na kadtong mga nagpuyo sa bukirang mga barangay.
Matud ni Osmena nga iyang awhagon ang City Council pagpahigayon sa usa ka special session aron nga kahatagan siya’g authority pag-apelar ngadto sa Korte Suprema aron karepresentahan ang riding public.