Cebu City – Gi-imbestigahan sa Cebu City Department of Social Welfare and Services (DSWS) ang giingong anomaliya sa bag-ong distribution sa Odette financial assistance.
Kini human si Portia Basmayor, pangu sa DSWS, nagkanayon nga nakadawat ang ilang buhatan ug daghang mga reklamo gikan ni Poblacion Pardo Barangay Captain Archie Araw-Araw kalabot sa beneficiary nga giingong nalista nga makadawat ug hinabang pero namatay na kini sa wala pa ang bagyong Odette.
Sa Facebook post niadtong Hunyo 5, matod ni Araw-araw nga pipila sa 2,444 ka mga beneficiaries nga co-living couples, o ang uban tua na sa abroad, o nangamatay na sa wala pa nahitabo ang bagyong Odette.
Gipasabot sa kapitan nga gumikan kay walay coordination ning higayona tali sa Mayor’s Information and Liaison Office (MILO) sa Cebu City government ug sa barangay labot sa lista, hinungdan nga nahitabo ang giingong mga anomaliya.
“Hapsay raman ang paghatag atong higayona pero karon, mura man naa lain tumong. NO COORDINATION sa atong part,” mensahi sa kapitan.
Nagkanayon si Basmayor nga ila na karong gi imbestigahan kung naunsa kini pagkahitaboa tungod kay ang MILO gitahasan pag verify sa matag beneficiary ug pagsiguro niini nga mga structure owners.
“Sa una nagcreate ang DSWS ug 8 ka teams nga mo-verify. Pero katong di na gyod madala tungod sa kadaghan, nagpatabang mi sa barangay ug sa MILO sa pag-validate,” pasabot ni Basmayor.
Kadtong mga indibidwal nga namatay human sa Odette, maka claim ang sakop sa ilang pamilya sa beneficiary; apan kadtong beneficiary nga namatay sa wala pa ang Odette, dili kini mahimong ma apil sa lista.
Sa pagka karon, kini lang ang nasuta nga insidente sa Barangay Poblacion Pardo, ug walay laing barangay ang mireklamo nga dunay mga patay na nga nalalip isip beneficiary.
Bisan niini, sigon pa ni Basmayor nga ang DSWS motan-aw sa reports labot sa double entry o co-living couples nga nalista ug naka claim sa financial aid.
Dili pa hinoon klaro kung unsay mahitabo sa barangay o MILO personnel, kinsa mamatud-an nga maoy naghimo sa mga anomaliya sa listahan sa mga beneficiaries, pero sigon pa ni Basmayor nga mokunsulta sila sa City Legal labot niini.
Dili pa sab makahatag ang CSWS ug pila kabook ang nalista sa giingong anomaliya, pero ila na kining gi imbestiga ang lista. (Jhon Tadlip)
(Source: City Social Welfare Services-Cebu City, photo courtesy of Archie Araw-Araw)
Tags: