Gipahamtangan sa upat ka buwan nga “suspension” ang Barangay Kapitan sa Mambaling, Cebu City gumikan sa kasong “Abuse of Authority”. Ang Committee of Three sa Cebu City Council nga gipangulohan ni City Councilor Sisinio Andales maoy mipahamtang sa upat ka buwan nga “suspension” batok kang Mambaling Barangay Captain Gines Abellana.
Pinaagi sa “Committee Report”, gimando ang pagpatuman dayon sa upat ka buwan nga “suspension” batok sa nahisgutang Barangay Kapitan tungod sa giingong pagpugong niini sa sweldo sa upat ka mga konsehal sa Barangay Mambaling.
Samtang gimando-an usab sa Cebu City Council ang Sangguniang Panlunsod Secretary ug ang City Treasurer pagpatuman sa “suspension” batok sa Barangay Kapitan.
Base sa reklamo nga nadawat sa Konseho, gipugngan ni Abellana ang sweldo nila ni Barangay Councilors Anne Marie Palomo, Edwin Managbanag, Victoriano Laborte ug Nenita Cuestas. Apan gitataw ni Abellana nga ang nahisgutang mga Barangay Councilors nagdumili pagserbisyo isip “Officer of the Day” sa Barangay Hall.
Kalapasan sa gimbut-an sa Local Government Code ang pagdumili sa upat ka mga konsehal pag-alagad isip “Officer of the Day” sa Barangay Hall, matud pa usab ni Abellana.