Gisupak sa sektor sa mga negosyante sa Sugbo ang hingpit nga pag-ban sa plastik. Nakita sa maong sektor ang pagka-importante sa paggamit sa plastic bag aron kasudlan sa mga gipamalit gikan sa mga malls ug uban pang merkado.
Gisugyot sa pangulo sa Cebu Chamber of Commerce and Industry (CCCI), Antonio Chiu nga dili lang hingpiton ang implementasyon sa plastic ban. Giawhag hinuon ni Chiu ang mga manufacturers paghimo’g mga innovation aron mahimong mas lig-on ang mga plastic bags ug subli kini nga magamit sa makadaghang higayon.
Gitataw ni Chiu nga ang paggamit sa plastic bags mas sayon ug dili gastoso kon itandi sa ubang alternatives sama sa papel, cardboard ug uban pa.
Matud usab ni Chiu nga angayan nga gamiton ang eco-bags sanglit makadasig man kini sa mga konsumidor sa dili na paggamit sa nipis nga sando bags nga gama sa plastik.
Ang paggamit sa mga nipis nga plastic sando bags maoy makadaot sa environment kay ka-usa ra man kini gigamit sa mga konsumidor, matud pa usab ni Chiu.
Gipaluyohan usab sa pangulo sa CCCI ang panawagan sa environmental groups nga i-ban ang single-use plastic sa kamerkadohan.
Ang nagkalain-laing Local Government Units (LGU’s) sa Sugbo mipatuman na karon sa plastic ban. Ang dakbayan sa Mandaue mipatuman sa hingpit nga plastic ban. Apan ang Cebu City government mipatuman sa selective plastic ban.
Samtang duha ka balaodnon ang naduso na karon ngadto sa ubos balay balaoranan (Lower House) nga nagtinguha pagpahamtang sa tag-10 pesos nga excise tax alang sa paggamit sa plastic bag.