Cebu City – Moabot ug 2 porsento sa Public Utility Vehicle (PUV) drivers sa Sugbo ang wala na mobyahe gumikan sa nagsaka nga presyo sa fuel ug kalisod sa ekonomiya.
Kini ang gibutyag sa Pinagkaisang Tsuper at Opereytor Nationwide (PISTON)- Cebu Chapter, sa media forum, Hunyo 21, 2022.
Matod ni PISTON-Cebu Chapter Coordinator Gregory Perez nga ang nagsaka nga fuel grabeng naka apekto sa jeepney operators sa Sugbo, diin sagad niini misud na ug lain trabaho.
Base sa data sa PISTON-Cebu, sa 11,000 ka mga jeepny units sa wala pa ang pandemic, dunay 30,000 ka mga drivers ang nag operate niining mga units.
Igo lang nakaabot sa katunga sa mga drivers o 15,000 ang naka balik pag byahe.
Sa mga naka balik ug byahe,dunay 2 porsento sa mga drivers ang nibalhin sa laing industriya o mipa uli sa ilang lugar aron mag-uma sa ilang mga probinsya.
“Dako ang epekto sa commuters nga nagsalig sa barato nga pletihan. Kay makita nato ang karsada, bisan dili rush hour, apiki na ang pagsakay,” matod ni Perez.
Gipahibaw sa PISTON-Cebu nga sa kakuwang sa mga drivers ug mga units nga mobyahe sa karsada, ma apektuhan ang mga ordinaryong commuters, tungod kay maglisod sila ug pangita ug PUV sa kadalanan.
Sa maong rason, dili mangayo ang PISTON-CEBU ug increase sa pletehan gikan sa Land Transportation Franchising Regulatory Board (LTFRB) tungod kay nakasabot ang mga drivers nga apil nga naglisod ang mga commuters.
“Diri sa amo, sa PISTON, wala pa sad mi ni file ug increase, sa national, naa nay nangayog og increase, naay ₱ 5, naay ₱ 6. Asa man kwaon sa mga tawo diri sa Cebu nga gamay ra gani ang umento sa sahod ₱ 31 ra,” pahibaw ni Perez.
Nasayran nga ni file ug ₱ 2 nga increase sa pletihan ang ubang transport groups sa Sugbo sama sa CITRASCO, uban sa Partylist 1-United Transport Koalisyon (1-UTAK), Visayas United Drivers Transport and Multi-purpose Cooperative (VUDTRASCO), Mactan Lapu-Lapu, Mandaue Transport Cooperative (MLMTC), Talisay Minglanilla Naga San Fernando Carcar Transport Cooperative (TMNSCTC), Mandaue Sabang Danao Multi-purpose Cooperative (MISADAMOD) ug Mauswagon Transport Cooperative.
Wala mo file ug increase ang PISTON-CEBU tungod kay matod pa ang umento mosangpot lang sa pag-antus sa mga konsumidor. (Jhon Tadlip)
(Source: PISTON-CEBU, photo courtesy of MyTV OPEN LINE)