Davao City – Magpatuman karon ang Lokal nga Kagamhanan sa syudad ug dugang 12 ka mga Bus nga moserbisyo sa mga pasahero sa Catalunan Grande ug Toril district ning syudad aron dili matanggong ang mga pasahero matag adlaw.
Kini ang gikomperma ni Retired Col. Dionisio Abude, ang hepe sa City Transport and Traffic Management Office nga dunay 12 ka bus ang mubyahe gikan Catalunan Grande ug Toril gikan alas 6:30-9:00sa buntag, samtang alas 5:00 hangtod alas 9:00 usab sa gabii.
Gipaklaro hinuon ni Abude nga dili tibuok adlaw magbiyahe ang nahisgutang mga Bus sa lugar samtang duna usab 7 ka mga bus stops hangtod Roxas ning syudad sa Davao.
Gipaningkamutan sab karon nga makakuha na og special permit ang maong buhatan pinaagi sa LGU Davao ngadto sa LTFRB aron makasugod gilayon ang byahe sa maong mga bus.
Gipaklaro sa opisyal nga dili kini ipatuman aron nga atbangan ang mga jeepney inay aron masulbad ang problema sa mga residente sa maong lugar. Plano sab nga iapil sa maong bus system ang Calinan ug Panacan, Davao City
Kahinumduman nga pipila na ka mga panahon nga nag antos intawn nga mupila ang mga residente matag adlaw aron lamang makasakay padulong sa mga skwelahan ug trabahuanan lakip na pauli.
Hinoon, sa pagkakaron padayon ang test nga ginapahigayon sa maong buhatan kauban ang LTFRB aron masulbad na ang maong problema.