Cagayan de Oro: Tulo ka tawo patay, human nakigpinusilay sa kapulisan sa Butong, Quezon, Bukidnon

Patay ang tulo ka tao human misukol ug pinusilay sa kapulisan sa may P-22 Butong, Quezon, Bukidnon, alas 6:30 sa gabii sa Agosto 21, 2022.

Visit RPN DXKO Cagayan de Oro

Ang mga namatay naila nga sila si Joseph Pateres y Aguilar aka Dodong Gonzaga Tatao, 39 anyos, adunay live-in partner, walay trabaho, ug residente sa nahisgutang lugar, Marissa Libringka y Roceña (live-in partner ni Joseph), ug uban pang kauban nga naila nga si Jun Plaza.

Nahitabo ang maong incidente atol sa paghatag og Warrant of Arrest sa subject person nga si Joseph Pateres tungod sa krimen nga Attempted Murder nga gi-docket ubos sa Criminal Case No. 344-2019 nga giisyu ni Acting Presiding Judge CARMEL G. GRADO sa Branch 4 11th Judicial Region, Panabo City pinetsahan niadtong Mayo 6, 2019.

Basi sa imbestigasyon, sa walay pagduha-duha, kalit nga nipabuto sa iyang armas nga kalibre 45 sa makadaghang higayon ngadto sa mga sakop sa operating team. Usa ka pulis ang nakaangkon og samad pinusilan sa iyang wala nga bukton hinungdan nga ang naglihok nga tropa mihimo og balos sa pagbuto sa armas nga miresulta sa armadong engkwentro tali sa naglihok nga tropa ug sa suspek uban sa iyang mga kauban.
Milungtad og halos 20 minutos ang armadong engkwentro sa wala pa ma-neutralize ang kaaway. Ang nasangpit nga mga tawo maoy suspek sa sunod-sunod nga insidente sa pagpamusil nga nahitabo sa dapit sa lungsod sa Quezon.

Narekober gikan sa possession ug control ni Joseph Pateres y Aguilar mao ang:
a.) usa (1) ka unit sa kalibre 45 nga armas;
b.) usa (1) ka unit nga granada;
c.) usa (1) ka medium heat sealed transparent plastic sachet nga adunay sulod nga white crystalline substance sa gituohang shabu nga gibana-banang gibug-aton nga 1.0 gramos ug gibanabana nga street value nga P 6,800 00;
d.) usa (1) ka unit caliber 38 revolver ang nakuha gikan sa iyang live-in partner nga si Marissa Libringka y Roceña; ug
e.) usa (1) ka unit caliber 38 revolver ang nakuha gikan kang Jun Plaza.

Ang mga naglihok nga tropa naningkamot nga madala ang tanan nga namatay sa operasyon sa pulisya sa labing duol nga ospital aron matambalan apan silang tanan gideklarar nga dead on arrival sa nag-atiman nga doktor nga si Dra Krystal Jane L Heyasa. Sa pagkakaron, ang mga nasamdan sa nga mga personahe sa PNP anaa na karon sa Malaybalay Polymedic Hospital nga anaa sa estable nga kahimtang. (Cheleste Simene)