Dili una mapatuman sa kasamtangan ang gisugyot nga omento sa honorarium sa Child Development Teachers (CDT), Barangay Nutrition Scholars (BNS) ug Barangay Health Workers (BHWs).
Kini ang opinyon sa buhatan sa City Budget kalabot sa gidusong sugyot ordinansa ni Konsehal Jose Pepe Abbu, Jr. nga usbawan ang honorarium sa mga CDTs, BNS ug BHWs ngadto sa ₱ 5,500.00; ₱ 5 mil, ug ₱ 4 mil.
Sa opinyon nga gipaabot sa buhatan sa City Budget ngadto sa konseho sa syudad ubos ni Bise Mayor Bebot Rodriguez, gipasabot nga naapektohan ang panudlanan sa dakbayan sa nasinating pandemya ug gani, bag-o lang nanumbalik ang mga kalihokan sa ekonomiya ug dili magarantiya nga makab-ot sa dakbayan ang gikinahanglang pundo alang sa maong sugyot.
Segun sa maong opinyon, giingon nga sa umaabot tuig 2023 ug 2024 gilantaw nga maminusan ang madawat nga pahat sa dakbayan gikan sa National Tax Allocation (kanhi Internal Revenue Allotment (IRA)) tungod kay minus man ang kinitaan sa nasud sa tuig 2020 ug 2021 tungod sa pandemya, kini nga mga tuig maoy basihan sa pahat sa dakbayan sa NTA.
Dugang pa, ang pagtunol og omento sa honorarium sa nahisgotang mga volunteers magdala og susamang hangyo sa ubang sektor nga nagdawat usab og honorarium gikan sa kagamhanan sa dakbayan.
Hinuon, ang City Budget Office uban sa buhatan sa City Legal miduso sa maong sugyot ordinansa ngadto sa Local Finance Committee (LFC) aron matun-an ug mapangitaan sa tinubdan sap undo alang sa umaabot nga mga tuig.
(Source: CIO-Cagayan de Oro City)