Gipahigayon karong adlawa, Agosto 15 sa kagamhanang lokal sa Cagayan de Oro pinangulohan ni Mayor Rolando ‘Klarex’ Uy ang ‘simultaneous’ o dungan nga pagpamilit og anti-dengue campaign stickers sa mga pampublikong sakyanan alayon sa pagpahugot sa kampanya kontra dengue.
Mismo si Mayor ‘Klarex’ ang nanguna sa pagpilit og sticker sa government vehicles sa syudad isip pagsuporta sa kampanya aron mokunhod ang kaso sa dengue ug sa hingpit wala na’y matala nga patay.
Sigon ni City Health Officer Dr. Rachel Daba-Dilla adunay 111% nga pagsaka sa kaso sa dengue sa syudad karong tuiga nga anaa sa 692, kung itandi sa 327 ka kaso sulod sa bulan sa Enero ngadto Hulyo sa milabay’ng tuig.
Dugang usab ni Dr. Dilla mitala na ang syudad sa 10 ka tawo nga namatay tungod sa dengue sukad Enero-Hulyo karong tuiga.
Nanawagan usab si City Councilor Dra. Maria Lourdes S. Gaane, chairperson sa Committee on Health and Health Insurance sa katawhan nga kanunay motuman sa 5S kontra dengue kon 1) search and destroy, 2) self-protection measure, 3) seek early consultation, 4) support fogging upon the recommendation of the authority ug 5) sustained hydration aron masumpo ang dengue.
Mapasalamaton usab ang CHO sa hugot nga suporta sa kampanya batok dengue ni Land Transportation Franchising and Regulatory Board Regional Director Aminoden D. Guro, Land Transportation Office Regional Director Nelson Manaloto, Department of Health X – Regional Director Dr. Jose R. Llacuna Jr ug Assistant Regional Director Dr. Ellenietta HMV N. Gamolo.
Ang pagpamikit og stickers batok dengue usa lang sa nakahan-ay nga mga kalihukan sa syudad ug magpadayon ang uban pang mga istratehiya diha sa kabarangayan uban sa hugot sa suporta sa mga kapitanes ug barangay health centers.
(Source: Cagayan de Oro City Information Office Facebook page)