Aron maabagan ang Cagayan de Oro City Police office (COCPO) sa pagpatuman sa kahusay ug kalinaw, buot mugnaon ni Mayor Rolando `Klarex’ Uy ang Oro police auxiliary teams.
Kini ang sugyot sa mayor atol sa gipahigayon nga press briefing kaganihang buntag diha sa Cocpo headquarter sa barangay 40 ning syudad.
Sa maong sugyot, gipadayag ni Mayor Klarex nga aron mo-qualify, matag miyembro sa team kinahanglan college level o college graduates, ug kinahanglan moagi pa sa screening.
Gipasabot sa mayor nga ubos sa superbisyon sa hepe sa matag police station ang mga miyembro sa auxiliary teams, diin ang ilang pagsulod sa team mag-agad sa rekomendasyon ni City Police Director Col. Aaron Mandia ug City Councilor Romeo Calizo, kinsa maoy chairman sa committee on police and public safety.
Matud pa ni Mayor Klarex nga mahimong i-tap niini ang mga job order nga kawani sa city hall aron maoy molangkob sa Oro police auxiliary teams.
Nasayran nga ang auxiliary teams pagalangkuban sa 20 ka mga miyembro ug ibutang sa matag police station ning syudad.
(Source: COCPO | Cagayan de Oro City Information Office Facebook page)