Gibuksan na sa publiko ang Kahimunan Northern Mindanao Regional Trade Fair karong adlawa, Agosto 19, diha sa SM City Uptown isip usa sa mga core events sa Higalaay Festival 2022.
Gipangulohan sa Department of Trade and Industry ang pagpahigayon sa trade fair aron mahatagan og higayon ang mga local products nga mapasundayag hilabina ning bulan sa kapistahan sa dakbayan.
Makita sa trade fair ang klase-klaseng food ug non-food products sama sa local delicacies, handicrafts, wearables, home decors and accessories, kape, tableya, canned and bottled products ug daghang pang produkto gikan sa lain-laing Micro, Small and Medium Enterprises (MSMEs).
Atol sa opening ceremony, mipadayag sa ilang mensahe ang mga kadagkuan sa DTI, lakip usab si Tourism Committee Chairperson Kagawad Jay Roa Pascual kinsa mipadangat sa suporta sa lokal nga kagamhanan diha sa maong kalihukan.
Nasaksihan usab ang pagpinirmahay sa Memorandum of Agreement tali sa DTI ug Cagayan de Oro Chamber of Commerce and Industry, Inc. alang sa SPEED Export Acceleration Program nga magdala og dugang kalambuan sa ekonomiya sa syudad.
Ang economic recovery usa sa mga priority agenda sa kasamtangang administrasyon ni Mayor Klarex Uy diin gihatagan og dakong pagtagad ang mga negosyante hilabina ang mga MSMEs sa dakbayan.
(Source: CIO-Cagayan de Oro City)