Kapin dos mil ka mga indibidwal ug magpamilya ang misalmot sa Kagay-an Festival Run nga gitawag og Family Fun Run nga usa sa mga kalihokan sa Higalaay Festival 2022 alayon sa kasaulogan sa kapistahan ning syudad kaganihang buntag Domingo, Agosto 21, 2022.
Ang kalihokan gi-organisar sa Circle Productions, Inc. inabagan sa Milo, Centrio ug lokal nga kagamhanan sa Cagayan de Oro sa administrasyon ni Mayor Rolando `Klarex’ Uy.
Si Jeffrey Ang sa Circles Productions namahayag nga kini ang unang ‘in person’ fun run nga gipahigayon human sa duha ka tuig nga pag-undang tungod sa pandemya.
“It’s time to start again that’s why gihimo nato nga Family Fun Run ug wala pud ni prize this is purely fun run,” matud ni Ang.
Apan adunay mga freebies nga nadawat ang mga partisipanti gikan sa mga sponsors. Lakip sa misalmot sa fun run si Konsehal Roger Abaday.
Sa iyang mensahi, gipasalamatan ni Eileen San Juan, chairperson sa Higalaay Festival 2022 ang tanang misalmot sa kalihokan taliwala nga anaa pa ang pandemya diin subli siyang nagpahinumdum nga dili kalimtan ang pagsunod sa health protocols.
Iya usab gipasalamatan ang mga personahi sa Circles Productions, Centrio Mall ug MILO nga dugay na nga partner sa mga kalihokan sa syudad ilabina sa Higalaay Festival.
(Source: CIO-Cagayan de Oro City)