Cagayan de Oro: Department of Agriculture Region 10 mitunol og baktin, feeds, ug mga bitamina alang sa 105 ka mga Hog Raisers

0
0

Mokabat 105 ka mga backyard hog raisers nga apektado sa African Swine fever (ASF) sa niaging tuig ang gihatagan og 3 ka baktin, 3 ka sako nga feeds, ug mga supplies gikan sa Department of Agriculture Region 10, Martes, Agosto 16, 2022.

Ang mga recipients gikan sa 16 ka barangay ning syudad isip first batch sa Swine Sentinel Program sa Department of Agriculture Region 10, diin usa ang local government sa Cagayan de Oro, uban ang Iligan City sa duha lamang ka mga LGUs nga unang napili sa DA alang sa maong programa karong tuiga.

Ang Swine Sentinel distribution gipahigayon sa Barangay Iponan covered court nga gipangulohan ni DA-10 Officer-in-Charge Regional Executive Director Milo Delos Reyes, City Councilor Jay Roa Pascual, City Administrator Atty. Roy Hilario Raagas, ug City Veterinarian Dr. Perla Asis, uban sa mga miyembro sa barangay council sa Iponan.
Ang mga kadagkuan sa DA-10 namahayag nga tumong sa sentineling program nga matabangan ang mga hog raisers nga mabalik ang tinubdan sa ilang panginabuhi human naapektuhan sa ASF.

Sila mipasabot nga obserbahan ug i-monitor sulod sa 40 ka adlaw ang mga baktin ug kon dili kini magsakit human sa 40 ka adlaw hingpit kining maangkon sa mga recipients.

Dili mominos 34 ka mga barangay ning syudad ang naigo sa ASF diin gatusan ka mga backyard hog raisers ang naapektuhan ug liboan ka mga baboy ang gipang-culling.
Kini nga kalamboan ang gikalipay usab ni City Councilor Pascual, chairman sa Committee on Agriculture, ug nagpasalamat sa DA sa kanunay nga pagsuporta sa programa sa agrikultura sa syudad.

Gipasalamatan usab ni Atty. Raagas ang DA nga napili ang LGU-CDO nga malakip sa sentineling program aron matabangan ang mga hog raisers nga makabalik pagpamuhi og baboy.

Alayon niini, giaghat ni Atty. Raagas ang mga recipients nga magtambayayong aron hingpit na nga mawala ang ASF virus dinhi sa syudad.

Source: CDO City Information Office

LEAVE A REPLY

Please enter your comment!
Please enter your name here