Dili lang serbisyo sa panglawas ug medikal ang napahimuslan sa katawhan sa Barangay Tignapoloan atol sa paglusad sa programa nga ‘Klarex nga Serbisyo sa Baryo’ ni Mayor Rolando Klarex’ Uy karong adlawa, Huwebes, Agosto 25, 2022.
Lakip sa midala sa ilang mga serbisyo ang buhatan sa City Economic Enterprises Department (CEED), City Housing & Urban Development Department (CHUDD), East-Westbound Terminal and Public Market (EWTPM), Roads and Traffic Administration (RTA) ug Cagayan de Oro City Police Office (COCPO).
Pipila ka indibidwal ang naalagaran sa mga personahi sa RTA kalabot sa mga clearances ug verification sa traffic violation diin usa ang magpahigayon og community service.
Laing mga indibidwal ang nagpakisayod kalabot sa socialized housing program sa syudad.
Si PMaj. Evan Viñas, information officer sa COCPO, namahayag nga dili mominos 40 ka indibidwal ang naalagaran usab sa kapulisan human nagkuha og police clearance.
Lakip sa naghatag og serbisyo ang Bureau of Fire Protection (BFP) pinaagi sa ilang medical checkup ug ingon man paghatag og fire protection tips sa mga molupyo.
Ang `Klarex nga Serbisyo sa Baryo’ regular nga pagahimoon sa administrasyon ni Mayor Klarex sa mga kabarangayan ning syudad human kini gilusad sa tinguha nga mahatod ang batakang mga serbisyo sa gobyerno ngadto sa katawhan nga dili na kinahanglan moadto sa city hall.
(Source: CIO- Cagayan de Oro City)