Cagayan de Oro: Agri-Fair & Garden Show gibuksan na sa Gaston Park

0
0

Isip usa sa mga core events sa Higalaay Festival 2022, pormal nang gibuksan sa publiko ang Agro Fair ug Garden Show adlaw’ng Lunes, Agusto 8, 2022 diha sa may Gaston Park ning syudad.

Ang kalihukan gipangulohan mismo ni City Mayor Rolando ‘Klarex’ Uy, inubanan ni City Councilor Jay Roa-Pascual, Chairman sa Committee on Agriculture, Fisheries & Cultural Communities; ug City Councilor Imee Moreno, mga department managers ug uban pa.

Sa iyang hamubong mensahe, misaad si Mayor Klarex nga dugangan ang pundo sa Agricultural Productivity Operations Office kun APOO aron molambo pa ang ekonomikanhong kahimtang sa mga mag-uuma sa syudad.

Gani man, dugtong pa sa Mayor nga bukas ang iyang buhatan kun ugaling adunay gustong ipadangat nga mga sugyot ang sector sa mga mag-uuma.

Nanawagan usab ang mayor sa panaghiusa sa tanang Kagay-anon, ilabina sa pagsaulog sa kapistahan ni Senor San Agustin, ang mahal nga patron sa dakbayan sa Cagayan de Oro.

Nasayran gikan kang Archie Alamban, hepe sa Agri Business Development Division sa APOO nga adunay kapin 50 ka mga gardeners ang misalmot sa Agro-Fair and Garden Show karong tuiga.

Samtang, aduna usab lima ka booth nga gilangkoban sa lain-laing grupo sa mag-uuma ang nag-display sa ilang mga produkto sa uma ug uban pa.

Ang Agro-Fair ug Garden Show 2022 abli gikan alas 8:00 sa buntag hangtud alas-9:00 sa gabie ug kini mulungtad hangtod Septiyembre 8, 2022.

Source: APOO

LEAVE A REPLY

Please enter your comment!
Please enter your name here