Gikalipay sa mga deboto ni Sr. San Agustin ang pagbalik sa face-to-face nga pagpahigayon sa Fluvial Procession diha sa Cagayan de Oro River atol sa kapistahan sa dakbayan, Agosto 28.
Misalmot ang 34 ka mga baroto o’ water vessel gikan sa nagkalain-laing grupo ug buhatan sa gobyerno lakip usab ang mga kabarangay ug pribadong sektor.
Nangulo sa Fluvial Procession ang mga personahe sa Philippine Coast Guard, PNP Maritime, Safer River Life Saver Foundation, Inc., City Disaster and Risk Reduction Management Department, ug City Tourism and Cultural Affairs Office.
Atol sa maong kalihokan, gipahigayon usab ang blessing sa Cagayan de Oro River, mga water vessels ug mga operator niini ug biktima sa Sendong.
Nasaksihan usab sa mga deboto ang ‘giant religious icons’ nga gilangkuban ni Sr. San Agustin, Santa Monica, Birhen sa Kota ug Our Lady of Mt. Carmel.
Personal nga miduyog si Mayor Klarex Uy sa kalihokan inubanan sa konseho ug uban pang opisyales sa dakbayan.
Gilauman nga magpadayon na sa mga mosunod nga tuig ang pagpahigayon sa face-to-face nga Higalaay Festival activities ubos sa administrasyon ni Mayor Klarex Uy. (Cheleste Simene)