Agtultuloy iti pannakaibunong ti tilapia fingerlings para iti livelihood program dagiti umili.
Daytoy ti maysa kadagiti ipapaay iti Provincial Agriculture Office a mairamraman iti Capitol Express Narimat a Masakbayan a programa ni Gov. Mathew Marcos Manotoc.
Segun ken ni Engr. Ma. Theresa Bacnat, Officer in Charge iti Provincial Agriculture Office, amin nga agkiddaw ket maipaayan iti taraknen da a tilapia fingerlings adda la ketdi pagpupukan dagitoy.
Ti pannakaited iti tilapia fingerlings para ti livelihood program dagiti umili ket tapno adda iti nayon a pamastrekan da malaksid iti panagtalon a namulagatan a pagsapulan ni ilokano. Ibunbunong daytoy ni Gob. Marcos Manotoc malaksid pay dagiti nagduduma a goods a maibunbunong kadagiti nagduduma nga ili a pagturturungan iti CAPEX ditoy probinsia.
Segun pay ken ni Engr. Bacnat, naiget pay a makikakammayet ti opisina da iti Sustainable Development Center nga idadaulwan ni Mrs. Luz Ortal iti pannakaipaay dagiti dadduma pay a kasapulan dagiti mannalon kas kadagiti agricultural inputs ken dadduma pay.
Ibunbunong amin dagitoy ni Gob. Marcos Manotoc iti programa a Capitol express Narimat a Masakbayan kadagiti 21 nga ili ken dua a ciudad ditoy Ilocos Norte tapno matulungan dagiti kailian iti aniaman a nayon a pagkasapulan ken serbisio a maited kadakuada. (Cita Macalipis)
(Source: Provincial Government of Ilocos Norte)