Batac: Lima a gakat nga adda pakainaigan ti salun-at, naipilan ni Cong. Marcos iti kamara de representantes

0
1

Inpakaammo ni Cong. Ferdinand Alexander “Sandro” Marcos ti umuna a distrito ti Ilocos Norte kabayatan ti naisayangkat a Provincial Universal Health Care summit dagiti ar-aramidenna iti kamara de representantes nga adda pakainaigan ti salun-at ken no kasano ti panangipangpangrunana iti benneg ti salun-at.

Visit RPN DZRL Batac

Inannugotna nga iti kangitingitan ti pandemia ket kurang dagiti “health workers” ken awan dagiti maiyannatup a pasilidad ken kagamitan iti pananglaban ti COVID-19.

Gapu iti daytoy, mamati ti diputado a masapul nga adda man wenno awan ti pandemia ket nasken a mapasayaat ti serbisio ti salun-at. Inbunannagna a kas pannakabagi ti umuna a distrito ket addan ti lima gakat nga inpilana iti kamara de representantes.

Impalgakna nga umuna ditoy ti tarigagayna a ma-upgrade ti district hospital idiay Bangui manipud iti level 1 ket mapagbalin a level 2.

Inlawlawagna a babaen iti daytoy ket maserbian a naimbag ti hospital dagiti kakailian nangnangruna kadagiti agindeg iti amianan a paset ti probinsia.

Kunana a babaen iti daytoy ket saanen a kasapulan pay nga umay agpaagas dagiti maseknan iti siudad ti Laoag wenno iti siudad ti Batac.

Malaksid iti daytoy, inpanamnamana nga aramidenna amin a kabaelanna tapno ilatangan ti kongreso ti naan-anay a pundo ti plano ni Mayor Remigio Medrano ti ili a Sarrat a mangipasdek iti Sarrat Health Center.

Imbatadna a babaen iti daytoy ket makumpleto ti nasao a proyekto iti sumaruno a tallo a tawen.

Inbunannagna a dagitoy ket sumagmamano laeng kadagiti addang a rumbeng a maipatungpal.

Kabayatanna, inpakaammo ni Cong. Marcos nga iti kaaddana ditoy probinsia ket agsursur iti nadumaduma a lugar iti umuna a distrito tapno agibunong ti “health pack” ken “food pack” para kadagiti health worker kas pagyamanna iti adu a sakripisio dagitoy iti kangitingitan ti pandemia. (Ronald Domingo)

(Source: Provincial Government of Ilocos Norte)

LEAVE A REPLY

Please enter your comment!
Please enter your name here