Nagpanawagan ni Gob. Matthew Marcos Manotoc kadagiti mangsupsuporta kenkuana a mangidaulo iti pannakaikkat dagiti poster ken tarpaulin na iti nadumaduma a paset ti probinsia.
Paset daytoy iti pammatina a maysa daytoy a wagas iti panangsaluad iti aglawlaw a maysa kadagiti kangrunaan a programana.
Inlawlawagna a malaksid a makadadael iti buya ti aglawlaw dagiti naperperdin a poster ken tarpaulin dagiti kandidato ket mainayon pay dagitoy a basura a mabalin a maibalenben iti canal apaman a madanon ti panagtutudo no saan a maikkat dagitoy.
Inlungalong ni Gob. Marcos Manotoc a ma-recycle wenno usaren iti sabali pay a mabalin a pakausaran dagiti poster ken tarpaulin tapno saan dagitoy nga agtennag a basura.
Ginutigotna dagiti kakailian a mangipamatmat iti panangipategda iti aglawlaw babaen iti panagkaykaysa nga agdalus kadagiti kalkalsada ken mangikkat kadagiti poster ken tarpaulin.
Innayonna a babaen iti daytoy, apaman a madanon ti panagtutudo ket maliklikan ti pannakapasamak ti layus gubuay ti napintas a panagayus ti danum kadagiti canal. (Irene Ringor)
(Source: Provincial Government of Ilocos Norte)