Gibutyag ni Fr. Genesis Labana, OSA, nakahukom sila pagkanselar sa naandan nga 5:30 PM mass karong adlawa sa Basilica Minore del Sto. Nino gumikan san kutay sa mga kalihokan nunot sa pagbukas sa National Youth Day (NYD).
Matud ni Labana nga ang Basilica Minore del Sto. Nino dili na usab mahimong madu-aw sa mga bisita sama sa mga turista tungod kay gitagana man kini alang sa National Youth Day delegates.
Libo-an ka mga youth delegates gikan sa lain-laing bahin sa nasud ang ania karon sa Sugbo alang sa mga kalihokan sa National Youth Day sugod karong adlawa, Abril 24 hangtud sa Abril 28, 2019.
Samtang ang Department of Health sa Central Visayas mibutang ubos sa heightened alert status sa Sugbo nunot sa mga kalihokan sa National Youth Day.
Gibutyag ni Dr. Shelby Blanco pangulo sa Regional Epidemiology and Surveillance Unit sa DOH-7, nga gisugdan nila ang mga pangandam sa National Youth Day sukad pa sa nakalabay nga tuig.
Nagkalain-laing augmentation teams ang gipakatap sa DOH-7 aron mo-abag sa nagkadaiyang Local Government Units (LGU’s) aron mo-atiman sa mga panginahanglan sa publiko ilabi na sa mga youth delegates.
Ang DOH-7 mopakatap usab karong adlawa sa augmentation teams niini hangtud sa Abril 28, 2019 nga maoy katapusang adlaw sa kasaulugan sa National Youth Day.
Samtang gibutang ubos sa red alert status ang kapolisan nunot sa kasaulugan sa National Youth Day.