Mapakgang na gyod ang dili makatarunganong presyo sa bugas humay sa Central Visayas.Ang National Food Authority (NFA-7) molusad ugmang adlawa, Nobyembre 13 alang sa Suggested Retail Price (SRP) sa bugas humay.
Gibutyag ni NFA-7 Director Fernando Nunez nga makigtagbo pa hinoon siya sa mga rice retailers aron pagseguro nga motuman gyod ang hingtungdang mga negosyante sa bag-ong Rice SRP.Gipasabot ni Nunez nga importante nga makasabot ang mga rice retailers sanglit dili man abunda sa bugas humay ang Central Visayas
Ubos sa bag-ong SRP, tag-39 pesos ang matag kilo sa regular-milled (local) ug well-milled (imported) rice samtang tag-44 pesos ang matag kilo sa local well-milled rice ug tag-47 pesos ang matag kilo sa local premium rice.
Ang rice retailers nga dili motuman sa bag-ong SRP hatagan og written warning alang sa First Offense. Alang sa Second Offense,ang malapasong rice retailers pahamtangan sa silot nga pagkabilanggo sulod sa upat ka buwan hangtud sa upat ka tuig ug multa nga dos mil pesos hangtud sa usa ka milyon ka pesos.
Unang gipatuman sa NFA ang bag-ong rice SRP alang sa bugas humay sa metro manila ug usab sa rehiyon 8 ug rehiyon 10.##