Nagpahigayon ug anti-illegal logging operation ang mga personahe sa kapulisan sa Provincial Mobile Force Company nga gipangulohan ni PSI Mark Navales kagahapong adlawa, Pebrero 13, 2019 pasado alas 7 ang takna sa buntag sa may Purok-4 Alinget, Brgy. San Juan sakop ning dakbayan sa Surigao.
Atol sa maong operasyon, na-aktohan sa mga kapulisan ang mga suspetsado nga nag-karga ug mga ginabas nga mga kahoy ug dali kini misibat ang mga suspetsado human nga naka-matikod nga adunay presensya sa mga kapulisan.
Nakumpiskar sa maong operasyon ang 96 ka mga kahoy sama sa togas ug yakal. Basi sa imbestigasyon sa mga kapulisan, ang mga ginabas na kahoy gipanag-iyahan ni Ronie Mavejas, 51 anyos, negosyante ug residente sa Sitio Kinabutan, Brgy. Rizal dakbayan sa Surigao nga hangtod sa pagka-karon padayon pang gipangita. Gibana-bana ang kadaghanon sa 991 board feet nga mikabat sa Php 39,640, ang mga nakumpiska nga mga kahoy gi turn-over ngadto sa CENRO.