Davao City- Gitakda nga maghimo ug “Validation” ang Philippine Drug Enforcement Agency kun PDEA inabagan sa uban pa nga mga ahensiya sa Kagamhanan kabahin sa giingong 86 ka mga narco-politicians list sa PDEA.
Sumala ni PDEA director general Aaron Aquino, nga kauban sa maghimo og validation ang Department of Interior and Local Government, National Intelligence Coordinating Agency, Philippine National Police ug Armed Forces of the Philippines.
“Maybe early next week, magsisimula na kaming mag-adjudicate ng mga listahan ng mga narco-politicians, and then mayron na kaming ma-dedelist o mailagay sa suspense file,” Sumala pa ni Aquino dihang mibisita sa PDEA-Davao kagahapong adlawa.
Gidugang sab niini nga anaa sa listahan sa narco-politicians ang naay gihuptan nga posisyon sa pagka-vice mayor pataas hangtud sa pagka-Congressman… Kung mahuman na nila ang adjudication sa listahan ug naa na sila’y makita nga nalambigit nga mga politiko ngadto sa ilegal nga druga, ila kining pasakaan og kaso sa korte.
Sa pikas bahin, BISAN pa man og napatya’g lima ka sakop ang Philippine Drug Enforcement Agency (PDEA) gumikan sa nahitabong ambush sa Lanao del Sur sa milabay’ng adlaw, apan magpadayon ug pakusgan pa ang operasyon sa PDEA sa tanang lugar sa nasud… Sa pakighinabi kang PDEA director general Aaron Aquino, atol sa pagbisita niini sa opisina sa PDEA-Davao Region, gipanganti niini nga mas pakusgan nila ang operasyon batok ilegal nga druga.
“Mas titindi yong mga gagawing operasyon namin sa lugar yan sa Lanao del Sur at sa mga karatig na mga lalawigan,” sumala pa ni Aquino.
Kahinumdoman nga lima ka mga operatiba sa PDEA-Armm ang patay samtang usa ang nasamdan dihang gibanhigan sa mga armadong grupo ang sakyanan sa mga personahe nga padung nga motambong sa usa ka aktibidad… Nagtuo si Aquino nga ang mga responsable sakop sa grupo sa mga drug lords sa lugar nga bout mobalos sa mga taga PDEA gumikan sa ilang gipangbuhat nga operasyon sa lugar.
“Mayron kaming operasyon d’yan at namatay yong isang drug lord sa lugar na yan, kaya yun ang tinitingnan namin, baka nga naghihiganti,” dugang pa ni Aquino.
Gidudahan sab sa PDEA nga konsabo sa lokal nga kapulisan ang mga responsable gumikan kay gibiyaan sa ilang escort nga mga pulis ang mga taga PDEA sa wala pa nahitabo ang insidente.
“Kaduda-duda yong mga moves nila, unang una nakabuntot lang sila, then for no reason nag-overtake sila, then minutes after inambush yong tropa,” sumpay ni Aquino.
Sa pagkakaron, na-relieve na ug gipailalom sa imbestigasyon ang upat ka mga pulis nga nag-escort sa mga sakop sa PDEA dihang na-ambush kini, samtang gina andam na sab ang kaso nga ipasaka batok sa mga responsable.