MATANAO, Davao del Sur – Wala na maitsura pa ang usa ka 102 anyos nga tiguwang human maligsan sa Pison samtang natulog sa ilawom niini didto sa Matanao probensiya sa Davao del Sur. Giila ang biktima nga si Jose Embodo nga usa ka biyudo ug residente sa Purok Pag-asa, Barangay Bangkal sa Matanao davao del sur.
Nasayran sa imbistigasyon sa Matanao Police Station nga nahitabo ang ensidente alas 8:30 sa buntag kagahapong adlawa (Lunes) dihang wala masayod ang Pison Driver nga dunay tawo nga natulog ilawom sa Pison.
Sumala ni Senior Inspector Renato Uy, hepe sa kapolisan Matanao, nga nakatambay ang pison nga gipanag-iyahan sa Sebastian Construction Heavy Equipment nga maoy nag-trabaho sa dalan sa lugar… Atubangan sa pison nisandig ang biktima aron mopahulay apan nakatug kini ug sanglit bungol na ang pandungog mao nga wa makamata dihang miandar ang makina.
Wa sab makabantay ang drayber nga si Billy Domingo Fontanilla, 44-anyos, minyo nga taga Sitio San Pedro, Barangay Inawayan, lungsod sa Sta. Cruz, Davao del Sur, hinungdan nga naligsan ug napisat ang kalawasan sa tiguwang… Hinuon, daling mitahan sa kapolisan ang maong drayber aron manubag sa salaod nga nahimo samtang ang patay nga lawas sa biktima anaa sa lokal nga punerarya sa dapit.